PRESENTACIÓN DA SEMANA DO PEÓN

A semana pasada celebramos "A Semana do Péon", onde as nenas e os nenos puideron practicar este xogo tradicional. 

A continuación deixámosvos unha pequena presentación con algunhas imaxes. Podedes ver máis fotos e vídeos na páxina web do cole (Pincha AQUÍ).

XOGOS POPULARES NO MAGOSTO

O venres 11 de novembro celebramos o magosto no centro e como non podía ser doutra maneira, foi unha xornada de moita diversión. Despois de degustar as castañas, tivemos a oportunidade de practicar diferentes xogos populares. 

Podedes ver a presentación premendo sobre a imaxe.

PLAN PROXECTA+ (PVAD)

Hoxe luns 7 de novembro, saíu a listaxe definitiva de centros admitidos para participar no Plan Proxecta+ durante o curso 2022/23.

Dentro deste Plan, o noso centro foi seleccionado no programa “Proxectos de Vida Activa e Deportiva (PVAD)” que ten como finalidade axudar aos centros a elaborar o seu proxecto de vida activa e deportiva, abordando a loita contra o sedentarismo, o sobrepeso e a obesidade a través do incremento, dentro e fora do horario lectivo, da carga real de actividade física que realiza o alumnado.

Para a súa consecución, temos planificadas gran variedade de actividades, como por exemplo:

- Patios activos e divertidos.

- Participación en distintas modalidades de XOGADE.

- Xornadas con actividades físicas e lúdicas en celebracións coma a Semana do Peón, o Magosto...

- Sesións teórico-prácticas de RCP e atragoantamento en EP.

- Andainas pola contorna.

- Milla diaria.

- Promoción de actividades físicas a través do blog de EF.

- Charlas sobre alimentación saudable.

SEMANA DO PEÓN

A próxima semana imos celebrar a "Semana do Peón", polo que se tedes algún na casa podedes traelo para desmostrarlle aos vosos compañeir@s as vosas habilidades. Tamén habilitaremos, na hora dos recreos, unha zona con buxainas onde teredes a oportunidade de xogar con elas.

Como xa sabedes, este é un xogo tradicional que recibe moitos nomes, como por exemplo: buxaina, trompo, peonza, bailarete, vira-vira,... e que forma parte do noso patrimonio cultural. 

No refraneiro popular podemos atopar varios refráns que falan das peonzas, e que indican os meses nos que este xogo é "Trending Topic".

Polo San Martiño, trompos ao camiño - 11 de novembro

Polo San Amaro, trompos ao faiado - 15 de xaneiro

Polo San Antón, peóns ao caixón - 17 de xaneiro

Pola Santa Olaia, peóns á borralla - 12 de febreiro

O primeiro é coñecer as partes do PEÓN e como se xoga. A buxaina é un xoguete feito de madeira, que se pode personalizar facilmente, pintándoo ao noso gusto. 

As partes do peón que debemos coñecer son:

O Ferrón: é o cravo de ferro sobre o que vira/baila o trompo.

O Pirucho: é a parte de arriba, algúns trompos non a teñen.

A Barriga: é a parte máis ancha do peón.

A Capa: Está comprendida entre o pirucho e a barriga.

A Piola: é a corda coa que se envolve o trompo e soe medir uns 50 cm.

Toca agora vestir o peón:

No xeito de vestir o peón está, en grande medida, o éxito para que o xoguete baile. Amárrase da maneira máis tensa posible arredor da barriga do trompo e sóltase rapidamente para facelo bailar. Nun extremo da piola adóitase facer un nó corredizo para evitar que escorregue entre os dedos.

Tamén inflúe a forma de tiralo, cada xogador/a ten que atopar o seu estilo: dende arriba, coma se o tirases cara o chan, ou paralelo ao chan coma se acendeses un motor dunha motoserra...

Podedes visionar estes dous vídeos, un deles sobre unha das formas de envolver a piola sobre o bailarete e como tiralo. No outro móstranse algúns trucos a realizar cando está a buxaina bailando.

Agora tócache a ti... pono na man... enrédalle a piola... e a bailalooooooo!!!!

* Os partidos de brilé que se ían disputar esta semana quedan aprazados, polo que retomaremos o campionato o vindeiro luns.

CAMPIONATO DE BRILÉ / PATIOS ACTIVOS - DIVERTIDOS

Comezado xa o campionato de brilé, recordade que podedes ver o calendario e a clasificación tanto no lateral dereito deste blog, como no panel informativo en fronte a aula de informática. 

Tamén podedes ver as fotos dos primeiros partidos, así como das proposta dos xogos dos patios, entrando na galería da web do cole.

Esperamos que vos gusten!!!

Se pinchades sobre a imaxe, podedes acceder a ela

PATIOS ACTIVOS-DIVERTIDOS

Iniciamos a semana con grandes novidades!!!!

A partir de mañá martes, comezamos cos patios activos-divertidos. Seguindo a liña continuista do ano anterior, moitas desas zonas xa vos van soar, pero tamén temos algunhas novidades que esperemos que vos gusten!!

A continuación deixámosvos unha presentación onde se explican as diferentes zonas das que consta o patio.

Outra das novidades é o inicio do Campionato de Brilé que comezará o xoves 6. O día antes teremos un partido de exhibición do alumnado de 6º de EP que nos axudará a familiarizarnos con este xogo. Podedes consultar a conformación dos equipos, calendario, clasificacións, regulamento... no panel de EF que está ao carón da aula de informática.

Aquí tedes os carteis destas dúas propostas.

                

ACTIVIDADE DE ESGRIMA

O luns e martes desta semana, o alumnado de 3º, 4º, 5º, e 6º de EP tivo a oportunidade de coñecer e practicar a esgrima. 

Foi unha pequena toma de contacto que consistiu nunha breve descrición teórica deste deporte, así como das súas armas e o seu equipamento. Tamén tiveron a oportunidade de practicar os movementos básicos e de realizar algún asalto, sempre guiados polo monitor.

Temos que agradecer aos compoñentes de Compostela Esgrima a súa colaboración para realizar dita actividade.

Se premedes sobre a imaxe, podedes ver as fotos das sesións.

CAMPIONATO DE BRILÉ

Aquí vos deixamos o cartel do Campionato de Brilé que imos organizar no cole. Se queredes participar, recordarde asistir á reunión que se vai celebrar o mércores 14 de setembro no pavillón durante o recreo.  Vémonos alí!!

ESCOLAS DEPORTIVAS

A partir de hoxe queda aberta a inscrición nas distintas Escolas Deportivas. 

Por un lado deixámosvos dous enlaces das actividades organizadas polo concello, un deles da propia páxina onde atoparedes a información e a folla de inscrición (Pincha AQUÍ), e un segundo enlace coa oferta de actividades (Pincha sobre a imaxe).

Outras das actividades que se ofertan en Silleda é a de esgrima. Tedes no cartel o teléfono de contacto.

  

PELÍCULAS

Nesta sección do blog iremos recomendando películas ou documentais, relacionados co deporte, que podedes ver en familia eses días que non se pode saír da casa a facer exercicio polo mal tempo. 

A primeira recomendación que vos damos é "Space Jam", na cal un dos protagonistas é Michael Jordan, un dos mellores xogadores da historia da NBA.

Se vos ten boa pinta a primeira, e quedades con gañas de máis, no 2021 sacaron a segunda parte desta saga; "Space Jam 2: Nuevas leyendas". Nesta ocasión o protagonista é a estrela da NBA Lebron James. 

En próximas semanas engadiremos outras recomendacións cinematográficas.